Пресудата за случајот „Тенк“ има бројни недостатоци. Освен суштествени недостатоци на постапката направени се и бројни повреди на Кривичниот закон, смета адвокатот на поранешниот помошник-министер за внатрешни работи Ѓоко Поповски, Стерјо Зиков.
На денешната јавна седница во Апелацискиот суд за жалбата на Поповски и на експремиерот Никола Груевски за првостепената пресуда, Зиков забележа дека материјалните докази не биле изведени правилно.
„Моите забелешки главно се однесуваа на суштествените повреди на кривичната постапка. Пред сè нагласок дадов на неправилното изведување на материјалните докази кои судијата дозволи само да се читаат како наслови во листата на докази, а не и содржински, што е спротивно на Законот за кривична постапка“, рече Зиков.
Според него, преседан е тоа што СЈО за две вештачења платило 5 000 евра. „Преседан е две вештачења кои се по 10-тина страни и кои во праксата јас ги плаќам од 100 до 200 евра, СЈО да ги плати по 2 500 евра, односно вкупно 5 000 евра. Тоа е сериозен преседан и проблем“, смета адвокатот.
Поповски во мај беше осуден на шест години и шест месеци затвор во предметот „Тенк“ за набавката на луксузниот „мерцедес“ од 600 000 евра. Второобвинетиот, поранешниот премиер Никола Груевски, како поттикнувач за сторување на делото беше осуден на две години затвор. Поповски е осуден за злоупотребата на службената положба, додека Груевски за стекнување лична корист и потикнување за извршување кривично дело. Во издвоена постапка за истиот предмет ѝ се суди и на ексминистерката за внатрешни работи Гордана Јанкулоска.
Груевски и неговите адвокати денеска не присуствуваа на јавната седница во Апелација. Експремиерот вчера обвини дека судот ќе донесе политичка одлука и ќе го прогласи за виновен.