Веднаш по доаѓањето на функција градоначалник на општина Центар дадов налог да се изврши ревизија на проектот „Скопје 2014“. Добра вест е што денеска сме тука и што ревизорските извештаи кои се направени пред три години во врска со проектот конечно се во вистински раце, рече градоначалникот на општина Центар, Андреј Жерновски по исказот во Специјалното јавно обвинителство.
– Ревизорските извештаи уште пред три години беа предадени во јавното обвинителство, но имаме тригодишен молк од обвинителството кое што реши да ги стави длабоко во нивните фиоки и спречи вистината да излезе на виделина. Во овие извештаи е јасно обележано дека има низа незаконски постапки во проектот „Скопје 2014“. Проектот првично беше најавено дека ќе чини 80 милиони евра, но тој сега чини осум пати повеќе, односно 640 милиони евра, рече Жерновски.
Жерновски истакна дека во СЈО ги доставил извештаите кои се изработени по барање на општината и додаде дека очекува правдата конечно да биде задоволена. Тој не даде подетални информации во врска со исказот бидејќи се работи за предистражна постапка.
Според него, кризата во Македонија ќе продолжи се додека нема правна разрешница и оние кои го сториле криминалот на одговараат за истиот.
Александар Тодески