Градоначалникот на општина Центар, Андреј Жерновски доставил барање за понуда до фирмата која треба да го руши нелегално доградениот објект на претседателот на Основен суд, Владимир Панчевски, информираше раководителот на Сектор за инспекциски служби при општина Центар, Кочо Стојчески.
– Станува збор за Анизор ДООЕЛ Скопје, фирмата која ја имаме и во рамковната спогодба. Кога ќе го добиеме одговорот потпишан од градоначалникот треба да обезбедиме полициско обезбедување и да се изврши уривање на објектот. Рушењето ќе се врши рачно затоа што станува збор за стара градба, рече Стојчески.
Градоначалникот Жерновски ги демантираше шпекулациите дека спроведува хајка против Панчевски.
– Сакам да ве уверам дека постапуваме како извршител бидејќи каде што ние како општина Центар гледаме дека има дивоградба. Не се работи за никаква хајка, се работи за почитување на основен принцип кој што го зацртавме откако дојдовме, рече Жерновски.