Тони Трајковски, кандидат за градоначалник на ВМРО-ДПМНЕ и коалицијата за Општина Гази Баба денеска изјави дека ќе продолжи со изградбата на основното училиште Вера Јоциќ, кое што следната година треба да биде пуштено во употреба, а потоа ќе следи втора фаза за изградба на нова училишна сала и изградба на повеќенаменско спортско игралиште.
– Ќе продолжиме и со проектот подршка на колективните згради во делот на санација и реконструкција на кровови фасади и лифтови, а исто така ќе го започнеме проектот за поддршка за проширување на топловодното греење во колективните згради односно субвенционирање на подстаниците и внатрешни инсталации. Ќе продолжиме со уредување на просторот пред секоја зграда, зголемување на зеленилото и засадување на нови дрвја. Во делот на комуналната хигиена ќе продолжиме со проектот за поставување на подземни контејнери. Во постапка сме на набавка на две комунални возила со кои ќе се врши миење и метење на улиците и верувам дека со ова ќе ја зголемиме хигиената во оваа населба, рече Трајковски.
Тој вети дека ќе продолжи и со реконструкција на сите улици, изградба на тротоарите, а како значаен проект за населбата Хиподром го означи проширувањето на улицата Благоја Стефковски.
– Ќе започнеме со проширување и правење влез од автопатот кон оваа населба за полесен сообраќаен пристап и излез и влез од оваа населба. Ќе продолжиме со проектот Хиподром 2 каде ќе обезбедиме локации кои ќе бидат понудени со почетна цена од едно евро и ослободување на дел од комуналиите за младите брачни парови. Со овие проекти ќе направиме населбата Хиподром да биде поубаво и попријатно место за живеење за нашите сограѓани. Затоа, почитувани сограѓани на 29 октомври масовно да излезете да го заокружите бројот 13 за да можеме заеднички овие проекти на дело да ги реализираме, рече Трајковски.
