Програмата за развој на Обединетите нации (УНДП), Центарот за управување со кризи, Заводот за рехабилитација на деца со оштетен слух, говор и глас и други проблеми во развојот Кочо Рацин – Битола и Министерството за образование и наука изготвија серија кратки информативни видео спотови кои можат да им помогнат на лицата со оштетен слух полесно да се справат со различни природни катастрофи, како што се земјотреси, поплави и поројни дождови.
Прв од серијата на видео спотови е за подготвеност и заштита во случај на топло време. Лицата со оштетен слух ќе можат да научат за основните постапки и процедури кои се препорачани и се применуваат во случај на високи температури.
Според Центарот за управување со кризи, со ова се продолжуваат активностите за јакнење на свеста и знаењето на различните категории граѓани за справување со кризни состојби.
Досегашната соработка, како што информираат, овозможи обука на околу 18.000 ученици и околу 2.000 наставници од училиштата, како и показно тактички вежби за справување со кризни состојби.