Пратениците од ВМРО-ДПМНЕ на денешната седница на Анкетната комисија за скандалот со прислушувањето бараа да им се обезбедат безбедносни сертификати на техничкиот персонал во Собранието и на оние пратеници кои ги немаат за да можат да се одржат затворени седници на кои би присуствувале високите владини функционери од оваа партија. Како и да е, Комисијата се уште не донела одлука дека седниците ќе бидат затворени, поради што претседателот, Петре Шилегов, рече дека нивното барање е преурането.
-Од каде знаете Бонева дека Груевски кога ќе дојде ќе добие затворена седница – и се обрати пратеникот од НСДП, Горан Мисовски, на пратеничката која бараше да се создадат услови за седници на кои ќе и биде забранет пристап на јавноста.
Шилегов посочи дека нема оправдана причина за седниците да бидат затворени. Нема доверливи податоци, рече тој, во тврдењата од „бомбите“ дека врвот на ВМРО-ДПМНЕ договарал изборни манипулации, наредувал гласачи да се тегнат за уши, дека било нарачано рушењето на Комосос и дека премиерот, Никола Груевски презел во своја сопственост поголема градежна површина на Водно.
-Не гледам класифициран податок во течењето по ногавици, тегнењето за уши, купувањето плацеви на Водно, барањето да се лустрираат судии во Кичево. Да не ја извртуваме работата на оваа Комисија – рече Шилегов и не доби контра-реплика од пратениците на ВМРО-ДПМНЕ.
Груевски денеска не се појави на закажаното сослушување пред Анкетна, а доколку се појаваше членовите на Комисијата ќе требаше да се поризнесат на барањето на ВМРО-ДПМНЕ седницата да биде затворена за јавноста. За да се затвори седницата, барањето на ВМРО-ДПМНЕ треба да добие мнозинство гласови од бројот на членови на Комисијата која е составена од 16 пратеници.
Деншниот предлогот на ВМРО-ДПМНЕ да се одложи сослушувањето, не доби мнозинство затоа што против гласаа пратениците од ДУИ, а воздржан беше пратеникот од ДПА. ВМРО-ДПМНЕ брои осум члена во Анкетна, а потребни се девет гласа за да се донесе одредена одлука.
Маја Васева