Руските пранкери Вован и Лексус на „Јутуб“ објавија разговор од експремиерот Зоран Заев кој го имал со лица кои се претставиле како активистиката против климатските промени Грета Тунберг и нејзиниот татко. Иако разговорот е снимен минатата година, снимката е објавена денеска. Ова е втор пранк за Заев, откако претходно, русите објавија разговор во кој му се претставуваат како поранешниот украински претседател Петро Порошенко и генералниот секретар на НАТО Јенс Столтенберг.
Дека разговорот меѓу Заев и лажната Грета се случил, во ноември 2019 потврди и советникот за односи со јавност, Марјан Забрчанец, кој го опиша како хибриден напад. Тогаш, Забрчанец посочи дека експремиерот навреме се посомневал во идентитетот на соговорничката, но, сепак разговорот бил воден до крај, за да се потврдат сомнежите. Разговорот бил закажан преку македонското дипломатско претставништво во Обединетите нации.