Химната на ромскиот народ „Џелем, џелем“ денеска се пееше пред Владата каде стотина ромски граѓани протестираа со барање за поголеми права и незадоволни од лошите услови во кои живеат. Протестот беше организиран по повод 8-ми април, Денот на Ромите, а почна како марш од Топаанско поле, од каде демонстрантите тргнаа кон Влада.
Таму беа прочитани барањата на ромската заедница до државата и фактите кои говорат за највисок степен на невработеност кај оваа етничка популација. Освен проблемот со невработенотста кај Ромите, организаторите поентираа дека Ромите живеат како граѓани од втор ред во Македонија, дека се редовно дискриминирани и етикетирани, и дека се злоупотребувани како гласачко тело.
„Маршот на гордоста и достоинството“ се одржа во организација на здружението „Романо Авази“. Од таму синоќа соопштија дека поради закани и заплашувања можно е маршот да не се одржи и барањата да не бидат предадени до Владата, но и покрај тоа маршот се одржа во мирна атмосфера.
Маја Васева