Градоначалничката на Скопје, Данела Арсовска од локација во близина на „Пластичарска“ за која тврди дека е дивоградба и дека поради градежните работи е небезбедна за околните објекти, ги повика министерот за внатрешни работи Панче Тошковски, директорот на ЦУК, Стојанче Ангелов и градоначалникот на Општина Чаир, Висар Ганиу да одгворат зошто не преземаат ништо за овој случај.
-Во моментов во општина Чаир спротивно на закон си почнале нова дивоградба, за жал во овој момент не реагира МВР, го повикуваме министерот Тошковски кој би требало да реагира, и го повикуваме Стојанче Ангелов овие необезбедениве дупки, каде може сакој случаен минувач да се повреди, да излезат на лице место и да ни кажат дали има сејфти фрст. Направен сериозен ископ, започната градба. Општина Чаир и „принцезата на дивоградбите“ го нема никаде. Возила нерегистрирани кои работат на објектот, без никаква дозвола, нема платено комуналии, нема одобрение за градење, нема проект, нема ниту еден документ со кој се гарантира безбедност на градба, и да не се чудиме она кое се случува во Македонија. Дополнително објектот е во ГУП на Скопје, каде овие тука си одлучиле да си прават зграда без ниту еден документ- рече Арсовска.
Градоначалничката вели дека објектот е на еден метар од посточките згради во близина, уште рече и дека службите на Град Скопје констатирале попаѓање на улицата каде што се гради објектот.