Утринава пред 5 часот повторно чад, пукање стакла и сирени ги разбуди жителите на Расадник, Кисела Вода, кога беше опожарено паркиран автомобил на улицата „Христо Татарчев“, а огнот зафати и други околни возила.
И покрај брзината на противпожарните екипи, жители на Расадник сведочат дека штетата е голема.
Пожарот се случува нецели две недели откако буквално изгоре целата површина на расадникот во Кисела Вода. За случајот беа осомничени три деца, кои наводно фрлале петарди, а пријава беше поднесена само против 14-годишникот, со оглед на тоа што останатите имале под 14 години и не подлежат на кривична одговорност.
Пред само месец и половина, на речиси истото место каде што утринава гореа возилата, беше опожарен друг автомобил.
Освен автомобилот кој бил мета на пироманите, во пожарот сериозно беа оштетени и други околни возила.