Златко Пенков,кандидат за градоначалник на ВМРО-ДПМНЕ и коалицијата за Општина Неготино денеска на прес-конференција изјави дека општината ги има сите предуслови за да биде уште подобро и подостоинствено место за живеење.
– Јас и мојот тим имаме јасна визија за општина Неготино: Општина Неготино – општина со сите обележја на урбана и модерна средина во која секој граѓанин има простор да твори и придонесува!
Нашата визија ќе ја реализираме преку следниве приоритетни проекти:
1. Дозавршување на проектите за комплетно решавање и подобрување на водоснабдувањето во Неготино преку реконструкција на воводоводна мрежа на 5 улици во градот, доведување на дополнителни 30 литри вода во системот и изградба на филтер станица.
2. Приоритет во општина Неготино е и асфалтирање на улици во градот Неготино и сите населени места.
3. Следен приоритет е обезбедување и регулирање на паркинг простор во центарот на Неготино со што ќе се реши сообраќајниот метеж во централното градско подрачје.
4. Заради побезбедно регулирање на сообраќајот, следно е изградба на кружни текови и тоа: на влезот на Неготино кај СРЦ „Младост“, во центарот на градот и на излезот од градот кон општина Кавадарци.
5. Во село Тремник асфалтирање на главната улица, додека во село Војшанци асфалтирање на пристапна улица, како и поставување на фекална канализација за с. Црвени Брегови и с. Дуброво.
6. Приоритет ќе ни биде и уредување на централното подрачје во селата Криволак, Тремник и Курија со асфалтирање и поставување на урбана опрема и паркови.
7. За да Неготино добие модерен пазар, реконструкција на Градски пазар Неготино со обезбедување на покриена конструкција и нови тезги е повеќе од неопходна.
8. Поради зголемениот број на работни места во последниве години, благодарение на раздвижувањето на пазарот на работна сила и инвестициите во Република Македонија, повеќе од видлива е потребата за зголемување на капацитетите на детската градинка во Неготино. Затоа ќе ги зголемиме капацитетите на детската градинка и ќе создадеме услови сите дечиња да бидат згрижени и повеќе да нема листи на чекање.
9. Се со цел да се обезбеди повисоко ниво на комунална услуга спрема граѓаните, ќе направиме набавка на возила и комунална опрема за потребите на ЈП Комуналец.
10. Спортувањето и рекреацијата стануваат дел од секојдневното живеење на граѓаните на општина Неготино. Затоа ќе се реконструира Градскиот стадион Неготино и СРЦ „Младост“ Неготино се со цел понатамошен развој на спортот и други рекреативни содржини во Неготино.
Ова се само дел од проектите содржани во нашата Програма за работа. Програмата што ја нудиме е остварлива, реална, јасна и прецизна и во неа се содржани потребите и барањата на граѓаните од општина Неготино. Општина Неготино поседува соодветни човечки ресурси и добра инфраструктура. Јас и мојот тим со добра организација, добра координација и домаќинско работење максимално ќе овозможиме истата да се реализира во целост!Нудиме реална Програма, нудиме работа, нудиме резултати, како и можност заднички да ја направиме општина Неготино посакувано и најдобро место на живеење во Република Македонија, рече Пенков.