Претседателот Стево Пендаровски донесе одлука да прогласи нова вонредна состојба, по предлог на Владата и консултациите кои ги имаше со Советот за безбедност во текот на денот.
Вонредната состојба продолжува и во наредните 14 дена, соопшти Пендаровски, според кого, оправдани се причините кои Владата ги навела во дописот до него.
Првата одлука за вонредна состојба беше донесена на 18 март, поради состојбата со коронавирусот и бројот на заболени во нашата држава. По истекот на првите 30 дена, на 16 април, претседателот прогласи нова вонредна состојба која траеше 30 дена и истекува утре.
Претходно, министерот Венко Филипче, кажа дека е важно вонредната состојба да биде продолжена, бидејќи дел од мерките за справување со коронавирусот и неговото ширење, важат само за време на вонредна состојба.
Според него, рестрикциите кои се воведуваат по предлог на Комисијата за заразни болести се важни инструменти, за надминување на пандемијата.