Апелациониот суд на јавна седница одлучува дали 11-те бомби во предметот „Топлик“ за случајот „Сончев град“ може да бидат доказ во постапката.
Адвокатката на обвинетиот Миле Јанакиески, Сања Алексиќ побара седницата да биде одложена со писмен поднесок, но судот го одби нејзиното барање.
Како првообвинет во случајот „Топлик“ е ексминистерот Миле Јанакиески, а со него се обвинети уште шестмина меѓу кои Томе Ѓурчилов и Димитар Димовски. Според обвинението, тие му нанеле штета на буџетот за продажба на земјиште за „Сончев град“ во Сопиште.
Обвининителот од СЈО, Бурим Рустеми рече дека не држат тезите на адвокатите на Јанакиески кои се темелат на Европската конвенција за заштита на човекови права, бидејќи Јанакиески бил прислушуван од неговите најблиски соработници, додека бил во врвот на политичката моќ.
„Јанакиески не е жртва“, рече Рустеми.
Лиле Стефанова од СЈО, бранејќи ја нивната жалба, рече дека не може со приватниот интерес да се штити криминалот.
„Ако не се бомбите, како ќе знаеме што истражуваме“, праша Стефанова.
Адвокатот на Јанакиески, Еленко Миланов, побара судот да ја отфрли жалбата на СЈО. Миланов вели дека бомбите не се доказ, тие се стекнати нелегално, тоа се само индиции, а не и докази во постапката. Тој вели дека ако судот ја прифати жалбата на СЈО, секогаш може да се појават нелегални снимки кои ќе се користени како доказ во некој јавен интерес.
-Законот за следење на комуникациите стапува на сила од 2013, а бомбите се снимани од 2010 до 2013 година, рече Методија Лазаревски, вториот адвокат кој ги брани обвинетите во „Топлик“.
Претходно, советот што го предводи експретседателката на судот, Татјана Михајлова, одлучи бомбите да не бидат доказ во постапката за случајот „ТНТ“ иако Аплеација веќе одлучи во случајот „Насилство во Општина Центар“ бомбите да бидат доказ во постапката. На ист начин советот на второстепениот суд одлучи и за предметот „Топлик“ и за предметот „Тендери“.
Тезите на одбраната се дека бомбите не може да бидат доказ во постапката, бидејќи се стекнати на незаконит начин, како и дека судиите не треба да ги ценат претходно донесените одлуки на скопска Апелација, која во два наврата одлучи бомбите да бидат доказ во постапката.