„Нашата работа е за јавноста, а не за пред колегите“, „Ми се објавува ми се плаче“,„Не сме џубокс, ние сме новинари“, беа некои од пораките упатени од новинарскиот протест пред Граѓанскиот суд Скопје.
– Им се забранува на граѓаните да го кажат својот гласа и да ја кажат вистината. Затоа сакам да им порачам, не им успеало на никого досега и нема да успеат. Само ќе направат да бидеме посилни и да дојдеме тука да ја пратиме пораката и сакам да им кажам дека нема да застанеме и нема да замолчиме – порача Сеад Ризвановиќ од ТВ24.
Протестот го организираа Здружението на новинари на Македонија (ЗНМ) и Самостојниот синдикат за новинари и медиумски работници (ССНМ) по објавувањето на пресудата за случајот „Феронвест против ИРЛ“ кој се однесува на тужбата за навреда и клевета против Истражувачката репортерска лабораторија.
Новинарите членови во синдикатот со самолепливи траки на усните симболично покажаа дека некој се обидува да ги замолчи и цензурира медиумските работници.