Кандидатот за градоначалник на Скопје, поддржан од Левица, Перо Камиказа, тврди дека доколку на локалните избори има излезност од над 65 отсто, тоа значи дека кандидатите од партијата и тој треба да почнат со славење.
„Да ги замолите сите ваши комшии, сите ваши пријатели да излезат на овие избори. Што поголема излезност, тоа поголема казна за ДПМНЕ и СДС. И да ви кажам една работа, ако ја видите бројката дека надминува 60 – 65 %, можеме комотно да се собереме и да славиме победа за Скопје заедно со сите советници и градоначалници на Скопје. Значи ве молам уште еднаш, агитирајте, не е битно за кого ќе гласате, само да излезат над 65%“, рече Камиказа на митингот пред Дом на АРМ.
Според Камиказа, останатите политички партии ќе прават се за да им се згади на граѓаните да гласаат и да создадат слика дека се е безнадежно, но според него Левица е надеж.
„Јас сум надеж“, извика Камиказа.