Ленин Јовановски од „Слобода превоз“ најавува дека блокадите не само што остануваат, туку и ќе ги прошират се’ додека не почнат преговори за да им се исплатат околу два милиони евра на приватните превозници.
Градоначалничката Данела Арсовска и ЈСП, Јовановски вели дека не ги исконтактирале за време на викендот и затоа продолжуваат со протестите, овој пат порадикално.
„Ова не е бавча на градоначалничката Арсовска па си ја работи како сака. Таа треба да постапува законски и според одлуките на Совет на Град Скопје“, рече Јовановски и нагласи дека уличарското однесување на градоначалничката довело до блокади.
Според него, мора да се лоцира вината за блокадите и граѓаните, место на превозниците да и се лутат на градоначалничката оти ги довела во таква состојба.
„Не можат граѓаните да ги критикуваат приватните превозници. Треба да го критикуваат изворот на овој проблем, а тој е кај градоначалничката која дозволи нешто вакво да се случи. Не смеат граѓаните да дозволат да имаат градоначалник кој треба да се грижи за нивните интереси и за јавниот интерес, кој на ваков начин ќе го нарушува. Треба да се посочат виновниците онаму каде што се, а не кај она што е последица од такво однесување“, рече Јовановски.
Тој ја повика и Владата да се вклучи во изнаоѓање на решение за приватните превозници иако директно нема ингеренции за јавниот превоз, но може да побара објаснување од институциите.
Со блокадата „Слобода превоз“ го држи во заложништво цел град, а граѓаните со часови патуваат дури и на најкусо растојание оти се блокирани клучните крстосници во Скопје.
Јовановски и „Слобода превоз“ им се извинија на граѓаните за протестот со блокада на градот.
„Изразувам жалење што денеска приватните превозници, по неколку обиди да седнат и да се договорат, односно да бидат примени од градоначалничката Данела Арсовска мораа на еден ваков начин да го изразат својот револт и да го свртат вниманието кон себе и уште еднаш да ги кажат своите позиции и она што навистина се случува“, рече Јовановски.
Се одлучиле за блокада на цел град оти сметаат дека се исцрпени сите други методи, вклучително и протестот со блокирање само на градската администрација и очекуваат граѓаните да изреагираат и да извршат притисок за решавање на проблемот.
„Ние сакаме токму граѓаните да изреагираат и да го посочат вистинскиот човек кој што е проблем во целата оваа ситуација“, вели Јовановски.
Подготвени се, какао што самиот вели да ги „ослободат“ граѓаните и да ги кренат блокадите истиот момент кога градоначалничката или некој овластен од неа ги повика на разговор за да најдат заедничко решение.
„Првиот момент ако градоначалничката, еве не мора ни таа ако не ја познава работата и не знае да ја менаџира, нека ги пушти претставниците од Јавното сообраќајно претпријатие, од секторот за сообраќај, нека седнат со нас, ние ќе најдеме решение некако во оваа ситуација и да ги ослободиме граѓаните. Не зависи ништо од нас. Приватните превозници не се тие кои го продуцираат овој проблем“, повика Јовановски.
Градоначалничката Арсовска по прес – конференцијата на Јовановски не излезе да даде објаснување дали ќе дозволи граѓаните да останат заложници на проблемот што го има со приватните превозници. Од нејзиниот кабинет рекоа дека можеби во текот на денот ќе направат прес – конференција.
Таа ги раскина договорите со приватните превозници и најави дека ќе има нов оглас на кој ќе може да се пријават, а приватните превозници пак сметаат дека такво нешто е невозможно оти не е согласно одлуката на Советот на Скопје.