Лидерот на ВМРО-ДПМНЕ, Никола Груевски денеска во Македонска Каменица кажа дека општината и градоначалникот Дарко Митевски ќе овозможеле граѓаните да можат да се стекнат со сопствен дом по симболична цена од само едно евро за квадрат, а најави и укинување или намалување на трошоците за комуналии и за градење на куќи.
– Ќе има целосно отпишување на долговите за комуналии за социјално ранливите категории заклучно со септември 2017. Нудиме концепт во кој ќе нема неосветлена и неасфалтирана улица и каде ќе има парк во секое маало. Ќе се изградат нови градски локални улици и реконструкции на постоечките улици. Ќе се изгради и пречистителна станица на Каменичка река, ќе се изградат нови водоснабдителни системи во руралните средини, рече Груевски.
Тој напомена дека ќе се реконструира и училиштето „Свети Кирил и Методиј“ и дека ќе се отвори нова детска градинка.
– Ќе се направи комплетна реконструкција на „Дом на рудари“ и негова адаптација во мултифункционален објект. Ќе се направи рурална развојна зона за помош на повозрасни лица кои сакаат да отворат бизнис во руралните подрачја, рече Груевски.