Советничката група на СДСМ и здружената опозиција на денешната седница на Советот на Град Скопје покрена две иницијативи, во интерес на граѓаните, рече на денешната прес-конференција советникот Драги Давчевски.
„Првата иницијатива е Универзална сала во Скопје да го носи името на Тоше Проески.
Инсистираме да се исправи неправдата што беше нанесена од страна на ВМРО-ДПМНЕ, веќе донесената одлука, Универзална сала да се именува Тоше Проески, да ја промени.
Ликот и делото на Тоше Проески остави длабоки траги во сеќавањата на сите наши граѓани и оваа сала треба да го носи името токму на личноста која е симбол на уметноста и хуманоста. Тоа е барање и желба на мнозинството граѓани на Скопје, но и на цела Македонија.
Втората e за намалување на цената на водата за пиење во Скопје за 30% поради:
– Зголемената сиромаштија и намалената куповна моќ на граѓаните како резултат на погрешните економски политики на Владата предводена од ВМРО ДПМНЕ.
– Неснаоѓањето на менаџерскиот тим на Водовод којшто нема капацитет да ги решава проблемите, не може да го зголеми процентот на наплата ниту да ги намали загубите.
– Расипничкиот однос на градоначалникот Коце Трајановски и дрското трошење на парите на граѓаните за луксуз и за барокна зграда покрај Вардар којашто досега чини 10 милиони евра.
Сметаме дека со намалувањето на цената на водата ќе се создаде простор за зголемување на процентот на наплата и намалување на загубите на вода, со што ќе се подобри финансискиот прилив за околу 6 милиони евра годишно“, рече во име на Советничката група на СДСМ и коалицијата во Советот на Град Скопје, советникот Драги Давчевски.