Актерот, Петар Арсовски, редовно учествува на протестите пред МРТ и пред Јавното обвинителство со кои се бара политичка независност на јавниот сервис.
Присуството на овие протести го смета за негова граѓанска должност и вели дека ќе продолжи да протестира се додека националната телевизиска куќа не почне да работи за граѓаните, а не за владејачката политичка елита.
– Тоа е наш сервис, ние го плаќаме, затоа сум револтиран и затоа доаѓам, и ќе доаѓам се дур не го ослободиме. Во ова време неинформиран човек е како слеп и глув човек, кога нема доволно информации не може ни да размсилува правилно. Ослободувањето на МРТ е мисија која ја имаме сите за конечно да го вратиме на граѓаните. Ние сме сопственици, ние го плаќаме, а со него владее Владата која нема интерес граѓаните да се информираат затоа што така со нив потешко се владее – вели Арсовски.
За време на вчерашната дебата во емисијата „Акцент“ на МРТ гостуваат тројца новинари и за прв пат по подолго време еден кој е критички ориентиран кон власта. Арсовски смета дека ова е обид на уредништвото на МРТ да наметне привид дека известува балансирано.
– Граѓанскиот притисок постои, но сакаат да предизивикаат привид. Меѓутоа тоа е сеење магла и замајување на гледачите бидејќи таа дебата беше смешна. Латас е веќе познат и отпеана песна, гостувањето на другите е привид, ги знаеме нивните ставови, сме ги чуле и претходно. Јас сакам во таа телевизија да влезе обичниот човек, зошто не го пуштаат генерал Ангелов на пример? – вели тој.