(ВИДЕО) Ангелов: Постои опасност да паѓаат бетонски парчиња, мостот кај „Ист Гејт“ ќе биде затворен додека не се санира

Од:

Мостот „Беласица„ кај Железничката станица во Скопје ќе биде затворен целосно за пешаци и за моторни возила се додека не се санираат штетите од пожарот кој го зафати долниот дел од мостот кој ги поврзува „Веро Џамбо“ и трговскиот центар „Ист Гејт Мол“ и се додека постои опасност од одронување на бетонски парчиња со кои е премачкан мостот.

Ова е одлука која ја донесе Градот Скопје, а ја соопшти директорот на Центарот за управување со кризи, Стојанче Ангелов.

– Пожарникарите излегле веднаш но не смееле да гаснат затоа што немале информации какви инсталации минуваат под мостот. Заклучокот беше дека има само една електрична инсталација со која се напојуваат светилките на мостот, а во средина на мостот минува цевка со дијаметар од еден метар низ која минува топла вода за парното во Скопје. Благодарение на нивната акција околу два часот пожарот беше ставен под контрола, а околу 4 часот беше целосно изгаснат.

Температурата надминува 1.000 степени целзиусови и од високата температура дојде до пукање на заштитниот бетон со кој што е намачкан мостот долу и постои опасност од оштетување на арматурата. Мостот е топол и утрово. Градот Скопје донесе одлука да го затвори целосно мостот за движење и на пешаци и на моторни возила – рече Ангелов.

Се додека не се утврдат точните штети на кои работи тим од Градот и неколку професори од Градежниот факултет, ЦУК нема да ризикува и мостот ќе остане затворен.

– Мостот верувам дека ќе биде отворен по неговата санација доколку таа е можна. Штетата ќе биде дополнително утврдена, а тие информации ќе ги има градот Скопје. Забрането е движење на пешаците под самиот мост затоа што постои можност од паѓање на бетонски парчиња. Една од можностите за причините е спој на електричните кабли, а втората можност е човечки фактор, но за тоа треба да се произнесе МВР – истакна првиот човек на ЦУК.

Во моментов за сообраќај во двете насоки е затворен мостот кај Нова железничка станица, од к-цата со ул. Ѓуро Ѓоновиќ и ул. Никола Карев до к-цата помеѓу ул. Беласица и бул. Гоце Делчев. Сообраќајот ќе се одвива во согласност со привремено воведен изменет режим, па сега возилата се пренасочуваат по околната сообраќајна улична мрежа.

Би можело да ве интересира

Во пожар во Струмица изгореа две куќи, двајца повредени

Најмалку пет лица загинаа во шумски пожари во Турција

(ВИДЕО) Бајден прогласи состојба на голема катастрофа во Ново Мексико

Поради пожарот итно се евакуирани околу 7.000 жители на Ново Мексико

Во пожар во штала во Франција изгореа 70 тркачки коњи

A1on

Во Лос Анџелес е издадена наредба за евакуација поради ширење на шумски пожар