Верниците од Куманово го прославија празникот Богојавление- Водици. Близу 40 момчиња скокнаа по крстот во базенот во дворот на Соборниот Храм Свети Никола.
Најсреќен меѓу нив беше 20 годишниот Виктор Петковски од Куманово. Тој изјави дека петти пат скока по крстот и дека веќе има искуство.
– Прв пат имам среќа да го фатам крстот. Господ на сите да ни даде благослов, среќа и мир, изјави дваесетгодишниот Петковски, кој додаде дека годинава очекува и спортски успеси на екипите од Куманово.
Отец Игор Здравковски информираше дека во сите православни храмови во Куманово каде што има услови се фрла крстот, а момчињата скокаат за благослов од Бога.
Празникот Богојавление-Водици масовно го прославија верниците од Кумановско кои во различни цркви го следеа фрлањето на крстот.
Дел од нив пресекоа славски колач за здравје и благосостојба и си зедоа осветена вода.