Во петок на полноќ завршува изборната кампања за претстојните локални избори закажани за 24 март. Во сабота и на денот на гласањето е изборен молк.

За Советот на Град Скопје и за градоначалник на Град Скопје своето право на глас можат да го искористат 443.770 граѓани запишани во Единствениот избирачки список на 536 избирачки места.

Општина со само три избирачки места е Вевчани каде треба да гласаат 2.055 граѓани, додека Куманово има најмногу запишани гласачи во избирачкиот список 88.708 кои треба да гласаат на 128 места. Најголем број избирачки места има општина Битола – 152, а таму треба да гласаат 81.000 граѓани.

Еден ден пред изборите, односно во сабота своето право на глас во казнено-поправните домови ќе го остварат 1.446 избирачи, а надвор од местото на живеење 136 избирачи со статус на внатрешно раселени лица, лицата што се наоѓаат на издржување мерка куќен притвор и немоќните и болните лица кои до денеска на полноќ ќе го побараат тоа од општинските изборни комисии.

Како што беше вчера најавено, ДИК во четврток ќе ги предава избирачките ливчиња  на општинските изборни комисии Општинските изборни комисии, пак, се должни еден ден пред изборите да го предадат изборниот материјал на избирачките одбори, односно најдоцна до полноќ на 23 март.

Поголем број од учесниците во кампањата веќе го доставија до ДИК, Државниот завод за ревизија и до Државната комисија за спречување корупција првиот финансиски извештај за приходите и расходите на жиро-сметката за изборна кампања од денот на нејзиното отворање до крајот на 10-иот ден на изборната кампања.

Финансиски извештај организаторот на кампањата е должен да поднесе и еден ден по завршувањето на кампањата и тоа на образец пропишан од министерот за финансии.

Ова се шести локални избори во Македонија. Првите се одржаа во 1990 година, следните во 1996, во 2000, во 2005, а последните во 2009 година.