Можностите што ги нуди општина Битола за странските инвеститори и поволности кои ги добиваат инвеститорите беа тема на разговор на денешната средба на битолскиот градоначалник Владимир Талески со делегација од стопанственици од градовите Истанбул и Измир, Република Турција.
Градоначалникот Талески ги запозна со Индустриската зона Жабени, каде 32 инвеститори веќе имаат купено 49 градежни парцели, издадени се три одобренија за градба, а веќе функционира и фабриката за автомобилски делови Кромберг и Шуберт. Турската делегација беше запозната и со просторот на старата касарна каде се создаваат услови за инвеститори, а во тек се и градежни активности на оние кои веќе имаат купено парцели. На средбата се разговараше и за повеќе други локации на кои е предвидена изградба на нови капацитети.
Турските инвеститори изразија интерес за разгледување на можностите, деталните урбанистички планови и конкретните локации на кои можат да ги реализираат нивните идеи за инвестиции кои се однесуваат на изградба на станови, капацитети за производство на сточна храна и био–ѓубриво и други конкретни проекти за кои ќе се разговара на идната средба.