Кај медиумите е забележан позитивен тренд во однос на објавувањето на информации поврзани со личните податоци, но се уште не се прави баланс меѓу јавниот и приватниот интерес кога станува збор за информации поврзани со носителите на јавни функции или познатите личности, беше истакнато на денешната тркалезна маса организирана во рамки на проектот „Заштита на личните податоци и медиумите“.
Експертот во полето на заштитата на лични податоци и медиумите, Љубица Пендароска посочи дека кога се работи за носители на јавни функции тогаш веста по автоматизам се објавува без разлика дали постои јавен интерес таа да биде лиферувана.
– Тоа е најголемата детектирана слабост која истовремено беше нотирана и од самите учесници на тркалезните маси. Медумските работници имаат должност да ја информираат јавноста за случаи кога носители на јавни функции се под сомнение дека сториле кривично дело, меѓутоа оној дел од податоците коишто не се од јавен интерес или се однесуваат на други лица кои на било каков начин се поврзани со нив, нема јавен интерес да бидат објавени, истакна Пендароска.
Учесниците на тркалезната маса препорачаа да се најде баланс меѓу јавниот интерес од една страна и приватниот интерес од друга страна.
– Ако целта на информацијата е работењето на одредена јавна личност попатно во веста се објавуваат и податоци за одредени лица кои не се јавни личности и притоа тие луѓе несакајќи се наоѓаат во целата информација при што им се нарушува нивното право на приватност, посочи Игор Кузевски, генерален секретар на Дирекцијата за заштита на личните податоци.
Според лидерот на проектот Наташа Пирц Мусар, медиумите треба да бидат свесни дека кога ќе објават некоја приватна информација за некое лице, тогаш повеќе нема враќање назад. – Многу е тошко да се поправат работите откако приватноста на одредено лице ќе се наруши, истакна Мусар.
Во рамки на проектот планирано е да се направи прирачник којшто ќе треба да им помогне на медиумите во секојдневното информирање.
Проектот „Заштита на личните податоци и медиумите“ е финансиран од ИПА ТАИБ 2012 програмата на ЕУ со поддршка на Дирекцијата за заштита на личните податоци.