Шестата по ред јавна трибина посветена на дигитализацијата денеска се одржа во Велес. На трибината говореа министерот за информатичко општество и администрација Дамјан Манчевски и градоначалникот на Општина Велес, Аце Коцевски. Свој осврт даде и д-р. Јасмина Дамјановска,
На трибината се зборуваше за дигитализацијата на земјата, како и за нејзината улога во професионализацијата на јавната администрација. Посебен акцент беше ставен на Националниот портал за електронски услуги како електронска платформа достапна на https://uslugi.gov.mk, преку која на граѓаните им се овозможува да добијат информации за јавните услуги и да користат е-услуги од надлежни органи.
Во декември, 2019-та започна со работа ажурираната верзија на Националниот портал за електронски услуги, достапен на uslugi.gov.mk . Порталот е воспоставен и управуван од Министерството за информатичко општество и администрација.
Граѓаните конечно на едно место ќе можат да ги добијат информациите за сите услуги кои ги нудат институциите, сите потребни документи за остварување на своите права, како и временската рамка за добивање на услугите. Како што истакна министерот Манчевски, на порталот достапни се 128 електронски услуги, од кои 58 се нови, а 8.400 корисници се веќе регистрирани и ги користат овие услуги.
Градоначалникот на општина Велес, ги поздрави проектите на Владата во сферата на дигитализацијата и се осврна на услугите кои општина Велес ги нуди за граѓаните. Општина Велес, е лидер во нудење на електронски услуги до граѓаните. На порталот на Општината граѓаните можат во моментов да добијат 47 електронски услуги.
Министерството за информатичко општество и администрација и понатаму ќе продолжи со организација на настани во областа на дигитализацијата. Дигитализацијата е стратешки приоритет на МИОА и на Владата на Северна Македонија, поради што во изминатите две години беа реализирани повеќе мерки и активности, насочени кон дигитализација на услугите и зголемување на транспарентноста на институциите.