Кандидатот за градоначалник на Град Скопје од ВМРО-ДПМНЕ, Коце Трајановски денеска на митингот во Бутел ги повика граѓаните масовно да излезат на овие локални избори и да гласаат според програмите и сработеното на градоначалниците, а не според обвинувањата и клеветите.
Тој се пофали дека кај него нема многу политика, туку има многу работа и многу градење и токму затоа граѓаните му ја даваат поддршката.
Трајановски изјави дека како роден скопјанец, одлично го познава Скопје и дека работи посветено за да ги намали неговите недостатоци.
– Бутел е општина која има урбан и рурален дел, Бутел е симбол за мултиетнички соживот и разбирање, Бутел е општина на млади луѓе. Не се сомневам дека така ќе остане и така ќе се развива во иднина, изјави Трајановски.
