„Замислете ситуација на 24. декември да бевме јас и моите пратеници во парламентот и 50.000 Албанци пред Собранието“, изјави лидерот на ДПА, Мендух Тачи.
„Замислете ние да имавме конфликт со собраниското обезбедување, тоа немаше да биде комедија. Нас можеа само преполовени и скршени да не изнесат од Собранието, но ќе имаше директен физички конфликт. Ако јас со неколку илјади Албанци ги газев барикадите и тргнев кон полицијата и поддржувачите на власта, тоа ќе беше директен конфликт меѓу Албанци и Македонци. Kолку аргументи треба да дадам дека нема шанси така да се однесуваме и оти нема да дозволиме меѓуетнички конфронтации кои би имале несогледливи последици. Тоа не сум го правел, ниту ќе го правам зашто сметам дека тоа е погрешна политика. Сметам дека така и македонската опозиција треба да гледа на моите политички ставови“, рече Тачи, во интервју за Дневник.
Тачи вели дека не е за предвремени парламентарни избори од проста причина што не сака да биде сфатен како човек гладен за власт.
Според Тачи, ДПА нема да го бојкотира Собранието и поради укажувањата од Тирана и од Приштина, дека тоа не е „наша свадба“. Но сепак Тачи го осудува исфрлањето на пратениците.