Укината е обврската за претседателот на СДСМ, Зоран Заев, секоја недела да се јавува во струмичкиот суд како четвртообвинет во случајот „Пуч“, а Кривичниот совет на скопскиот Основен суд го одби барањето на Јавното обвинителство да му се одземе пасошот.
Во понеделник, пак, закажано е ново рочиште за овој предмет во кој првообвинет е поранешниот прв разузнавач, Зоран Верушевски.
До сега се одржаа две рочишта, но материјалната расправа не отпочна затоа што Заев не се појавуваше во судот. Се очекува и овој пат расправата да се одложи и стартот на судењето воопшто да не започне.
Предметот треба да го преземе специјалната јавна обвинителка, Катица Јанева, која е задолжена за истрагите поврзани со масовното прислушување и наводите кои произлегоа од прислушуваните разговори. Јанева се уште се нема произнесено за овој предмет.
Верушевски и Ѓорѓи Лазаревски остануваат во притвор додека рочиштата се одложуваат. На сопругата на Верушевски и Бранко Палифров, кои беа притворени на први февруари, мерката притвор им беше укината на крајот на јули.
Експертите велат дека специјалната јавна обвинителка веќе требаше да оформи став за овој предмет.
-Не може да се чека на неа да формира тим, туку треба да преземе нешто. Тоа е нејзина обврска, да се изјасни и да оформи став – смета поранешната прва антикорупционерка, Слаѓана Тасева.
Маја Васева