Во кривичниот суд денеска треба да почне од почеток судењето за случајот со насилството пред Општина Центар, во кое првообвинет е експремиерот Никола Груевски, заедно со Миле Јанакиески, Даниела Рангелова и десетина други лица.
Според новиот распоред на претседателот на судот, Иван Џолев, предметот ќе го суди судијата Душан Јосифов од Основниот суд Скопје 1. Јосифов го доби предметот од Татјана Михајлова, а со распоредот на Џолев, таа од овој месец суди прекршоци во бараките во Градскиот парк во Скопје.
Името на судијата Јосифов во медиумите почна да се споменува во 2013 година кога како истражен судија правел увид на местото каде што загина новинарот Никола Младенов, сопственикот на неделникот „Фокус“.
Во предметот на СЈО, „Насилство“, четвртообвинетиот Томислав Лазаров и петтобвинетиот Јордан Ристевски признаа вина и добија условни казни, а за обвинетиот Димче Крстев се води издвоена постапка. Другите 11 обвинети се изјаснија дека не се виновни.
В. Маглешов