Цела ноќ траеше борбата со големиот пожар кој го зафати ридот над Црнобуки и Лисолај, а кој како последица на ветерот се прошири и кон селото Лопатица простирајќи се на речиси шест рида, објави Канал 5.
Откако во гаснењето на огнот се вклучија два хеликоптерa на АРМ, кои ја отстранија опасноста огнената стихија да стигне до првите куќи во селото Лисолај, пожарот е ставен под контрола, а 90 пожарникари, лица вработени во Македонски шуми, волонтери од противпожарното друштво Пегаз се на терен со цел да ја следат состојбата.
Вчера најголем проблем беше силниот ветер кој го прошири огнот и на боровата шума, но и на непристапен терен каде беше невозможно да се гаси со копнени сили. Поради ова изгореа над 100 хектари нискостеблеста шума. Пожарот започна од запалена сува трева во близина на месноста Црнобуки, но поради ширењето стигна и во близина на три истурени куќи во селото Лисолај што внесе паника кај месното население и ги остави локалните села под облаци од чад.