Средношколци, ученици во автомеханичарска струка од Средното општинско училиште „Ѓошо Викентиев“ од Кочани, преку проект финансиран од програмата Еразмус плус ги усовршуваа своите практични вештини и знаења од автомеханичарската дејност.
Во рамки на проектните активности од „Иновативна обука за ученици автомеханичари“ десетина ученици од ова училиште поминаа десетдневна обука во меѓународна автомобилска работилница во Атина, Грција.
– Обуката се реализираше во рамки на проектот финансиран од Националната агенција за Европски образовни програми и мобилност, преку програмата Еразмус плус на ЕУ и фондацијата „Павел Шатев“. За време на престојот во Атина, учениците имаа можност да се стекнат со практични знаења од она што е нивен образовен профил и струка и се надевам ќе им помогне многу во нивната професија да бидат конкурентни на пазарот на трудот. За усвоените вештини и стекнатото искуство сите ученици добија и меѓународни сертификати, изјави Димче Сребренов, директор на СОУ „Ѓошо Викентиев“ од Кочани.
СОУ „Ѓошо Викнетиев“, како што рече помошник-директорот Владо Симеонов, деновиве доби за реализација уште еден проект од обука на ученици во странство. Имено десет ученика и еден професор од електро струката ќе престојуваат во Португалија.
Обуката на учениците во странство е дел од програмата на ова средно училиште за обучување кадри од повеќе струки и профили кои се застапени во програмата за тригодишно и четиригодишно образование во училиштето. Со кочанските средношколци на обука во Атина престојуваа и по десет ученика од училиштата од Струмица и Крива Паланка.
Во рамките на овој прокет се најавува и размена на наставен кадар со средни училишта од неколку земји од Европа.