Во Агенцијата за млади и спорт се одржа средба помеѓу директорот Марјан Спасески и претседателот на Федерацијата за спорт и рекреација на инвалидите на Македонија Бранимир Јовановски.
Претседателот на Федерацијата Бранимир Јовановски го информираше директорот Спасески дека состојбите во оваа сфера изминатите години благодарение на Агенцијата за млади и спорт се значително подобрени, спортистите со инвалидитет имаат пристап до спортските објекти и достапност до спортските реквизити.
Јовановски додаде дека оваа федерација како членка на Меѓународниот параолимписки комитет и на Асоцијацијата на европските параолимписки комитети има постигнато многу успеси. Тој го информираше Спасески и за последниот настап на Параолимпијците на Параолимписките игри Рио 2016 година.
Директорот Спасески истакна дека Агенцијата за млади и спорт во донесената Програма за развој на спортот во Македонија за периодот од 2013 до 2017 година, еден од главните приоритети е и поддршката на спортисти со инвалидност заради нивно учество во рамки на меѓународниот систем на натпревари за овие категории на спортисти и поддршка на Федерацијата за спорт и рекреација на инвалидите на Македонија.