На денешната јавна седница ДИК го поништи гласањето на избирачкото место 0816 во Зајас, општина Кичево, откако утврди дека на списокот биле потпишани дека гласале 412 лица, а во избирачката кутија имало 416 гласачки ливчиња.
Но, приговорот кој се однесуваше на ова избирачко место поднесен од штабот на Гордана Сиљановска Давкова се однесуваше на податоци поврзани со одѕивот на гласање. Од таму изразија сомнеж за полнење на гласачките кутии затоа што излезноста на гласачите до 15 часот била 110 лица, во 17 часот според податоците, гласале 407 лица. Ова во приговорот се толкува дека значи оти еден гласач гласал на секои 25 секунди, за да може 297 лица да гласаат за само два часа, што според нив, е индиција за полнење кутии.
Мнозинството членови на ДИК констатираа дека иако не можат да утврдат дали станува збор за полнење на кутијата, одлучија да го отворат избирачкиот материјал за да ги отстранат сомнежите, кои како што рече членот на ДИК Елизабета Постоловска, се провлекувале уште од референдумот.
По увидот во изборниот материјал ДИК го поништи гласањето на ова избирачко место, но одлучи да не се повтори гласањето, затоа што нема да влијае на крајниот изборен резултат.
Галена Николовска-Ризвановиќ