Веќе 22 дена не може да се лоцира дваесет и шестгодишниот Пинета Секондо-Пино, кој последен пат бил виден во Ѓорче Петров на 10 декември, а исчезнал со неговиот автомобил „шкода“ со таблички SK-1566-AP. Неговата мајка, Маја Трковска, на социјалните мрежи моли за помош и додава „Игла на некој министер да беше, до сега ќе ја најдеа“. Таа за „Макфакс“ вели дека во ништо не се сомнева, но од друга страна, се ѝ е сомнително.
„Искрено, не се сомневам на никого. Од друга страна, сè ми е сомнително. Јас чекам нешто да ми кажат. Пино е дете кое нема земано пари на заем оти нема потреба, не одел по коцкарници. Ништо не укажуваше дека може да се случи ова. Тој на 23 декември требаше да патува за Италија, таму да го прославиме Божик. Не знам како се случи ова. Имаше планови. Се договараше со брат му и братучетка му за да шетаат“, вели Трпковска.
Мајката на Пино ги замолува сите, доколку го видат или имаат каква било информација да се обратат до неа или да пријават во полициска станица. Вели, секоја информација е добредојдена. Од Министерството за внатрешни работи не даваат никакви информации, ниту на мајката, ниту на медиумите.
„Истрагата е во тек, се работи на случај ист како и за сите други исчезнати лица. Не можеме да дадеме повеќе информации во моментов“, велат од МВР.
Фотографијата од Пинета Секондо е објавена и во делот „исчезнати лица“ на веб-стајтот од Министерството за внатрешни работи.
Кристијан Ландов