Помладиот син на ексдиректорот на УБК Сашо Мијалков и синот на Влатко Мијалков, поранешниот директор на Царинската управа, се на распит во полициска станица во Кисела Вода, откако било пријавено дека во група со уште тројца, вчеравечер претепале 19-годишно момче во скопско кафуле.
„На 27.03.2021 во 00.30 часот во Полициска станица Центар, И.С.(19) од Скопје пријавил дека на 26.03.2021 околу 21.45 часот во и пред угостителски објект на подрачјето на Центар бил физички нападнат од Ж.К., А.М., М.К., Ф.М., С.Р. и И.С.. Лицата се повикани во полициска станица и известен е јавен обвинител. Се преземаат мерки за расчистување на случајот“, велат од МВР.
Според неофицијални информации, тепачката прво започнала во кафулето, а продолжила надвор на улицата, во скопско Дебар Маало.
Повреденото момче прво било пренесено во болница, за да му се санираат повредите, а потоа, половина час по полноќ, момчето го пријавило случајот во полициска станица.
