Утринава затворот „Скопје“ во Скопје испратил известување до Основниот Суд Скопје 1, дека осуденото лице Никола Груевски не се јавил доброволно на издржување на затворската казна.
По ова известување и по неуспешните обиди на Груевски да му се врачи решението од Кривичниот совет кој ја одби неговата жалба, Кривичниот суд може стражарно да го приведе и да го однесе на издржување на двегодишната затворска казна. Доколку експремиерот е недостапен, ќе биде распишана домашна или меѓународна потерница.
Никола Груевски од четвртокот е недостапен за контакт, а го нема ниту на работното место во Собранието. Тој барањето за одложување на затворската казна го правдаше со неговото неопходно присуство во Собранието, каде што во тек е постапка за измени на Уставот. Изминатите три дена работеше Уставната комисија, но пратеникот Никола Груевски не присуствуваше на дебатата.