Шефицата на Мисијата на ОБСЕ во Скопје Нина Суомалаинен на денешната средба со специјалната јавна обвинителка Катица Јанева и понудила поддршка и соработка, се наведува во соопштението од Мисијата на ОБСЕ во Скопје.
Суомалаинен и Јанева разговарале за новата улога на обвинителката и претстојните предизвици.
Суомалаинен и честитала на Јанева за формирањето на нејзиниот тим од вкупно дванаесет обвинители, истакнувајќи дека Канцеларијата на Обвинителката мора да продолжи да биде независна и слободна од секаков вид притисоци, за да постигне резултати кои ќе бидат фер и објективни.
– Важно е дека обвинителката има тесна соработка со институциите. Нашата мисија е тука да помогне, рекла шефицата на Мисијата на ОБСЕ во Скопје.
Суомалаинен во оваа пригода го поздравила договорот постигнат на средбата на лидерите на политичките партии на 5-6 ноември 2015, за натамошно спроведување на Договорот од Пржино.
– Правилното спроведување на Договорот од Пржино и почитувањето на законите, вклучувајќи ги оние кои беа усвоени вчера во Собранието, ќе овозможат еднакви услови на претстојните избори, посочила Суомалаинен.