Бизнисменот Сеад Кочан по вчерашната одлука со која се одбива неговото барање и жалбата за одложување на затворската казна, не се појавил во затворот Идризово. Боби Мојсоски, директорот на КПУ Идризово, за А1он вели дека рокот за пријавување на Сеад Кочан истекол вчера на полноќ. Судијата за извршување на санкции утрово е известен од страна на управата на затворот дека Кочан не се појавил на издржување на казната.
Од овој момент судот ја презема целата постапка за негово пронаоѓање и спроведување во КПУ Идризово.
Од Кривичниот суд пак велат дека Кочан дури денеска го примил решението со кое се одбива одложувањето на затворската казна и во кое стои дека веднаш треба да се пријави во затворот Идризово. Доколку бизнисменот сам не се пријави во текот на денот, надлежниот судија за извршување на санкцијата треба да побара асистенција од полицијата за негово пронаоѓање.
Бизнисменот Сеад Кочан е осуден на 4,8 години затворска казна за добивање на незаконски тендер од 2011 година распишан од државната фирма „Електрани на Македонија“ (ЕЛЕМ) за ископување јаловина и јаглен од рудникот Суводол во Битола.
Првично Кочан на 17 јули требаше сам да се пријави во затвор, но издржувањето на казната беше одложено поради поднесеното барање за одложување на затворската казна.