СДСМ реагираше на прес конференцијата на Александар Бичиклиски кој обвини градоначалникот на Струмица преку фирмите на неговото семејство ги врти парите во круг. Во соопштението од СДСМ се вели:
„Станува чудна и загрижувачка состојбата во владејачката партија ВМРО – ДПМНЕ. Имајќи ги во предвид резултатите од своите анкети за високиот рејтинг на градоначалникот Зоран Заев наспроти поразителните рејтинзи на можните кандидати од нивната партија, луѓето од ВМРО – ДПМНЕ не избираат средства за да го извалкаат името на струмичкиот Градоначалник. По стариот добар обичај својствен на ВМРО – ДПМНЕ тие недозволени средства се лаги, интриги и манипулации. Да не беше смешно ќе беше жално но Бичиклиски, Груевски и братучедите на премиерот сами се фаќаат во стапица.
На завчерашната прес-конференција тврдеа дека Општина Струмица има склучено договори за јавни набавки со фирмата ИГМ „Еленица” за да денес и самите признаат дека станува збор за јавни набавки на ЈПКД „Комуналец”, а не Општина Струмица.
Измешаните лончиња во партијата на Груевски само докажуваат дека или немаат елементарни познавања за тоа, кој со која институција управува или се прават паднати од Марс.
Сите граѓани во Република Македонија можат да ги проверат сите јавни набавки на сите институции во државата, вклучително и на Општина Струмица. Еве можност и самите да се уверат кој лаже а кој ја зборува вистината.
Во периодот за кој зборуваат лажговците од ВМРО – ДПМНЕ, ЈПКД „Комуналец” склучил договори за јавни набавки во висина од преку 100.000.000 денари со преку 70 различни фирми, меѓу кои и фирми блиски до владејачката гарнитура, а Еленица е само една од нив.
Законот за Јавни набавки е јасен и концизен. Во него стои дека сите фирми можат слободно да конкурираат на сите распишани тендери. Што е тука нејасно?
Останува енигмата, кои етички норми важат за братучедот на Заев, а кои за братучедите на Груевски.
Кој е Зоран Заев и што сторил досега знае цела Македонија, особено граѓаните на Струмица. Затоа јалови се сите гнасни обиди на владејачката гарнитура да промени било што околу неговиот рејтинг. Осум години со макотрпна работа е граден тој рејтинг и не може никој па ни ВМРО – ДПМНЕ преку ноќ истиот да го сруши со паушални измислици извадени од ракав“.