„Добро е што уплашената власт на Никола Груевски конечно ќе ги намали глобите, ќе воведе мерка опомена и скалест пристап во казнената политика.
Погрешните и репресивни политики на Груевски ја донесоа најголемата сиромаштија од независна Македонија.
Со години укажуваме дека неразумните политики на власта на Груевски водат кон банкрот на граѓаните и фирмите што денеска е реалност.
Затоа и зборувавме за потребата од опомена пред казна, предлагавме намалување на казните за 50 проценти и можност помалите фирми да плаќаат помали глоби.
Во 2013 година, додека ги промовиравме овие мерки, власта затвораше фирми, изрекуваше глоби во илјадници евра, менуваше закони внесувајќи вртоглави суми казни.
Само за пример, парламентарното мнозинство на Груевски изгласа казни од 1.500 до 9.000 евра за најранливата категорија граѓани, мајстори, занаетчии кои работат за дневници од по 150 денари.
Поради ова огромен број мали и средни фирми се веќе со клуч на врата.
Да не говориме за казните од 7.000 – 25.000 евра за лекарите, казните до 500-тини евра воведени со Законот за сообраќај и слични примери, што ги гласаше мнозинството на Груевски и остануваат на сила.
Никола Груевски, препиша низа решенија на СДСМ во својата предизборна програма, но за жал и овие мерки од казнената политика на коишто апелиравме, се случуваат многу задоцнето, откако целосно ги исцедија фирмите и граѓаните.
Укажуваме дека ад хок решенијата на власта не се доволни.
Нема логиката да се примени скалеста казнена политика, а да не се примени скалеста даночна политика.
Потребни се системски промени за што е потребна промена на власта.
СДСМ со Програмата за враќање на средната класа, на чиишто дополнувања работи, ќе го врати достоинствениот живот на граѓаните во Република Македонија“, се вели во соопштението на СДСМ.