33 годишниот Русин Денис Червов сакал да види што има зад три метри високата ограда на резиденцијата на претседателот Иванов, пренесе Канал 5.
Бил забележан од обезбедувањето и приведен. Русинот се правдал дека живее во стан под кирија во близина на резиденцијата и оти пешачел секое утро и се прашувал што има зад оградата. Утрово решил да влезе во дворот.
Червов како гостин на методистичката црква дошол во државава кон средината на јуни и имал повратна карта за на 14-ти август преку Белград.
Полицијата му го проверила и телефонот на Русинот и во него немало никакви слики на резиденцијата каде што живее претседателот Иванов со семејството, ниту пак од вилата Водно.
Од Методистичката црква потврдиле дека имаат таков гостин, а полицијата и натаму истражува дали исказот на 33-годишниот Русин е точен.
Инаку претседателот Иванов со сопругата и синот се на одмор во вилата Билјана во Охрид.