Здружението „Здравје со игла не влегува“ жестоко реагираше на препораките од Министерството за здравство за вакцинација на децата по прогласената епидемија на морбили. Родителите чии деца не се вакцинирани повикуваат на граѓанска непослушност преку неплаќање даноци, со цел нивните пари да не се трошат на милионски тендери за купување на, како што велат, „најевтино ѓубре од вакцини“. Тие сметаат дека со задолжителното вакцинирање се кршат основните човекови права.
Денес – гордите родители на невакцинираните деца од Македонија решија да станат и да му покажат среден прст на…
Posted by Здравје со игла НЕ влегува on Петок, 04 јануари 2019
„Нема повеќе да ви дозволуваме да ги користите нашите сопствени пари за наше угнетување.
Недостигот на вистински податоци од регистрирани случаи на морбили, конкретна и релевантна анализа на генотипот на вирусот на морбили можеби се само начин успешно да го сокриете фактот дека за вашата епидемија се виновни токму вакцинираните индивидуи и дека ‘епидемијата’ ви е индуцирана со вакцина.
Заинтересирани сме исто и за тоа како ќе го оправдате вашето фашистичко кршење на човековите права и тоталното лудило пред Европа и Стразбур кон кои демек се стремите. Во целата Европска Унија вакцините се исклучително право на избор на родителот. Воедно и ви честитаме на најголемиот правен гаф и преседан достоен за светските насловни страници“, се пишува во објавата на социјалните мрежи.
Од здружението најавуваат изготвување прокет за отворање градинки и училишта во Македонија каде што нивните деца кои не се вакцинирани ќе бидат примени.
„Ќе се ангажираме во изготвување проект и бизнис-планови за отворање Валдроф градинки и училишта во Македонија (покрај поднесување претставка до Народниот правобранител, поради дискриминација преку необезбедување простор за невакцинираните и психичка пропаганда) каде што дечињата нема да се малтретирани од вашите фашистички војници, туку нежно ќе се работи на развивање на нивната личност и вистински спообности. Градинки и училишта каде што нема да се хранети со вашата отровна процесирана храна туку со органски произведено овошје и зеленчук“, додаваат од здружението „Здравје со игла не влегува“.
Кристијан Ландов