Најдоцна до четврток до полноќ треба кандидатите за претседател на државата да ги достават кандидатурите до Државната изборна комисија (ДИК). За официјализирање на претседателската кандидатура потребно е кандидатите да достават 10.000 граѓански или 30 пратенички потписи.
Кандидатурата со собраните потписи вчера ја поднесе Блерим Река, кандидат од албанската опозиција, а до крајниот рок се очекува тоа да го сторат и Стево Пендаровски, кандидат на СДСМ и коалицијата и Гордана Слијановска-Давкова, кандидат на ВМРО-ДПМНЕ и коалицијата.
Државната изборна комисија треба во рок од 48 часа од доставувањето, да ја потврди кандидатурата, а доколку има неправилности, истата се враќа, по што во рок од 48 часа треба да бидат отстранети неправилностите.
Кампањата за претседател на државата почнува на 1 април и ќе трае до 19 април по што следува изборниот молк. Првиот изборен круг за шестите претседателски избори е закажан за 21 април, а вториот ќе се одржи на 5 мај. По кој реден број ќе се најдат кандидатите, ДИК ќе утврди на 25 март со ждрепка.
Втор круг на гласање ќе има доколку ниту еден кандидат за претседател не го добил потребното мнозинство гласови и тогаш гласачите ќе бираат помеѓу двајцата кои освоиле најмногу гласови. Кампањата за втор круг завршува во 24:00 часот на 03 мај, а гласањето се одржува на 5 мај. Победник на изборите е еден од двајцата кандидати кој во вториот круг освоил повеќе гласови, но под услов да биде остварен цензусот односно доколку гласале повеќе од 40 отсто од запишаните избирачи. Доколку и во вториот круг на гласање ниту еден од кандидатите за претседател не го добил потребното мнозинство гласови, се повторува целата изборна постапка.