Регионалниот одбор на СОНК од Прилеп денеска на прес-конференција го обзнани ставот да не учествува во штрајк што го најави Синдикатот за образование, наука и култура.
– На денешниот состанок Регионалниот одбор донесе став против одлуката на Советот на СОНК за организирање генерален штрајк, бидејќи од 34 синдикални организации на Регионалниот одбор на СОНК Прилеп, кој ги покрива Прилеп, Крушево, Долнени и Кривогаштани – сите се изјаснија против одлуката за генерален штрајк, изјави Ванчо Спиркоски, претседател на Регионалниот одбор на СОНК од Прилеп.
Според Спиркоски, ставот е донесен по изјаснувањето на секоја од 34-те синдикални организации. Тие остануваат на барањата, но да се постигнат преку дијалог.
– Нашите 1.500 членови беа запознати со барањата на СОНК. Само 220 члена беа за генерален штрајк, а мнозинството се против. Ставот е барањата на СОНК да се постигнат преку дијалог со Владата и со ресорните министерства, рече Спиркоски и додаде дека нема притисок за најавениот штрајк на СОНК.