Бугарскиот претседател, Румен Радев, најостро го осуди, како што рече, систематското кршење на правата на Бугарите во Република Северна Македонија и влевањето омраза кон нив и повторно ќе го постави ова прашање пред европските лидери и институции.
Шефот на бугарската држава смета дека „искажаните амбиции за членство на Република Северна Македонија во Европската Унија и преземените заложби за реформи и зајакнување на демократските норми во земјата се во спротивност со реалноста во која живеат македонските Бугари во Македонија“.
Причина за неговиот став е синоќешниот напад врз Бугаринот Христијан Пендиков, секретар на клубот „Цар Борис Трети“ во Охрид.
Радев објави дека Бугарија е подготвена да организира воздушна евакуација на Пендиков, кој е повреден и се наоѓа во болница и да му обезбеди лекување, пренесе БНР.бг.
Амбасадорот на Скопје во Софија е повикан во Министерството за надворешни работи за да му предаде протестна нота.
Министерот за надворешни работи, Бујар Османи, го осуди инцидентот.