Поранешни работници на кичевски ЕМО и до скоро работници на Прототип, кои неодамна добија отказни решенија од фабриката за челични конструкции со протест пред општинскиот комитет на ВМРО-ДПМНЕ се обидуваат да ги решат своите социјални проблеми, објави Радио Слободна Европа.
Работниците се жалат што се оставени на улица, без работа, без пари, без иднина и визија како да опстануваат натаму во животот. Со огромни долгови за неплатени сметки во домаќинствата стравуваат од полошо.
Тие ги повикуваат кичевските пратеници на средба, бараат од нив помош за да ги остварат барањата од Владата. Работниците тврдат дека во Прототип нема работа, ниту иднина, затоа сите надежи им се насочени кон Владата. Најголем дел околу 70 отсто, од 80 поранешни работници имаат стаж од преку 25 години, а останатите се млади луѓе.