Министерката за труд и социјална политика Мила Царовска заедно со раководниот тим во Министерството оствари работна средба со претставници на УН Агенциите предводени од постојаниот координатор на ООН и постојан претставник на УНДП во Република Македонија, Луиза Винтон.
Работната средба ја отворија министерката Мила Царовска и постојаниот претставник Луиза Винтон при што информираа дека целта на оваа работна средба беше да се поразговара како за досегашната, така и за идната соработка помеѓу Министерството за труд и социјлана политика и УН Агенциите во остварување на заедничките приоритети.
Имено, Министерството за труд и социјална политика гледа стратешки партнер во УН агенциите во имплементацијата на реформите за креирање на политики на социјална заштита и праведност кои се во насока на остварувањето на целите за одржлив развој.
Токму затоа, раководителите на сектори пред претставниците на УН Агенциите ги презентираа стратешките приоритети во сите сектори на Министерството за труд и социјална политика, согласно со програмата на Владата на Република Македонија и стратешкиот план на Министерството.
Воедно беше побарана поддршка од УН агенциите за нивна реализација, но и изразена надеж за долготрајна и искрена соработка и посветеност во заложбите за правилно инклузивно општество за сите.
Министерството за труд и социјална политика ја организираше средбата во соработка со Фондацијата Фридрих Еберт – канцеларија Скопје.