Јавната здравствена установа Центар за јавно здравје-Битола од денес до 24 овој месец, на подрачјето на општина Битола ќе врши превентивна систематска дератизација.
Од ЈЗУ Центар за јавно здравје – Битола информираат дека превентивната систематска дератизација претставува општа против епидемиска мерка која се реализира секоја пролет и е во согласност со Законот за заштита на населението од заразни болести.
Со дератизацијата ќе бидат опфатени подземниот канализациски систем со ревизионите и прифатните шахти во сите реони на градот, прифатниот канализациски систем во околината на објекти од јавен интерес како што се детските градинки, основни, средни и високо образовни институции, Домови за сместување и престој на ученици и студенти, Домови за сместување на стари и изнемоштени лица, Домови за деца без родители и за деца со посебни потреби, медицински установи, јавни претпријатија, банки, објекти од областа на културата, објекти на локалната самоуправа и други општински објекти.
Од ЈЗУ Центар за јавно здравје-Битола посочуваат дека пролетната превентивна дератизација ќе се врши и во канализацискиот систем на колективните станбени објекти како и на јавната депонија „Мегленци“ и диви депонии во градот.
Активностите на теренот ги спроведуваат екипи обележани и заштитени со знаци за предупредување, информираат од ЈЗУ Центар за јавно здравје-Битола.