Претставници на Одделението за превенција при Полициската станица од општа надлежност денеска делеа флаери со едукативна содржина, под мотото „Да ја заштитиме шумата од пожар“.
Акцијата со цел едукација на населението, беше реализирана на регионалниот пат Кавадарци – Мушов Гроб, кој води кон десетина села под планината Кожуф.
– Подрајчето е главно шумско и постојат можности да се случат шумски пожари, затоа тука ја спроведуваме акцијата, рече Димитар Каракулев, инспектор за превенција.
Неколку дена претходно, во полицијата се одржа средба на Советодавната група граѓани на која се анализираа пожарите на отворено од минатата година. Се разговараше и за подготвеноста за справување со евентуални пожари ова лето.
