Претседателот на Република Македонија Ѓорге Иванов, придружуван од сопругата Маја Иванова престојува во работна посета на Кралството Шпанија, каде ќе учествува на 28. годишна сесија на форумот Кран Монтана, што се одржува во Барселона.
Како што информираат од Кабинетот на Претседателот, темите на дискусија на годинашниот форум се фокусирани на производството на енергија, климатските промени, мигрантската криза, зајакнувањето на улогата на жената во општеството и можностите за соработка на Медитеранот, Африка и Блискиот Исток.
Иванов, вчера се обрати на официјалната сесија на отворањето на форумот на тема „Каков свет за иднината? Стратегии за стабилност во непредвидлива средина – кон нов начин на управување“.
На сопругата на македонскиот претседател Маја Иванова утре ќе и биде доделена наградата Златен медал на форумот Кран Монтана за нејзините активности, проекти и иницијативи од хуманитарен карактер.
Форумот „Кран Монтана“ е основан во 1986 година со цел да обезбеди широка меѓународна соработка и поврзување на економските чинители на светско ниво, како и да придонесе кон глобалниот економски раст, обезбедувајќи стабилност, еднаквост и безбедност. Активностите и настаните во рамки на форумот се насочени кон создавање платформи коишто ќе им овозможат на политичките и бизнис лидери да ги имплементираат своите стратегии, да ги зајакнуваат партнерствата и да развиваат нови можности за соработка. Форумот соработува со меѓународни институционални партнери, како агенциите на Обединетите нации, Европската унија и Советот на Европа.